قصتي مع اليسا

[هلالــ من يوم ولادتي ــي]

تتجمع الحروف وتنقلب الطاسه ونجمع الصوف وناكل الكوسه ونحتري المصروف وعيشتنا كلها حوسه ونحاول نسافر وليه مانسافر ونطلع ليه مانطلع
ونجيب العيد ليش مانجيبه ونفكر ليش مانفكر وشكلي بنجلد اليوم ليش ما انجلد وندخل بالسالفه ليه ماندخل وترى هالدور مايصلح يالاعب في ورق خسران

معاجم خاصه
تلزخ = يعني سطرني أو ضربني
اليساء = وحده من الشباب
كاكـا= خويي لاعب ميــلان الايطالــي ماغيره
زنمه = يعني يارجال
ولد مياده = مثل سالفة ولد منيره عندنا بالسعوديه
****** = شي مشفر ماينقال
هلالــي = محدثكم طاال عمره


كنت جالس طفشان وما أدري وش أسوي فاقمت قلت خلن نسير على كاكــا اشوف خشته مبطي عنه وأنا طالع الا فيه سياره واقفه عند بيتنا عليها طبعات بيبسي وشعار البيبسي والا هو واحد لابس نظرات يقولي هيه انت تعال وأنا اجي بمشيه هلالــيه يعنني أن هالي انت واقف عنده بيتي مهوب بيت أبوي وقاعد افر هالسلسه أصول العربجه والزحف واجي وأحط يدي اليسري على باب السياره ويدي اليمنى افر فيها السلسه يوم شفت خشة الرجال الا كنه شاربن عصير ليمون تقرفطت خشته وسد خشمه وسئلني يقول ياخيو بدي اسئلك عن بيت (هلالــي ) وأنا انبسط قلت بالله عد أسمي بالبناني ياهو شي وطلع يده ومسك رقبت ثوبي وجرني وحلتني جنبه قال شو هالدم التئيل قلت بلاك توك ماشفت شي تراي نكوتي بس بالليل والتفت علي وعطاني نظره حاده وانا أقمط وهو يمشي واقعد ساكت شوي والا يوم دق جواله وهو يرد ويقول اهلين مياده وأنا اقرب اذني بسمع صوتها الا هي تقول هاه لئيت (هلالــي) وهو يقول ايوه هدا هو معي وأنا استانس ولا شعورياً قلت احلى فيه بنت تعرفني مادريت الا هو ماسك فرامل الا يوم خشتي سيرت على القزاز الي قدام وزودها سطرني كف الله لايوريكم وأنا اسكت قلت شكلها امه وأقمط واصير عاقل وهو قعد ينافخ مدري شيقول بالبناني انا ماكنت متوقع الحتسي البناني صعب ولد خالي دحيم اذكره يقولي اللبنان تقدر تسافر لهم بدون جواز مثل الطائف عشانهم يسولفون عربي مثلنا وطلع خرطي وأنا التفت له لفته صغيره وأبتسم وهو مهوب يمي وأطالع بصلعته وأضحك وأنا أفهي وأضحك ضحكه قويه من قوها غمضت ماصرت أشوف وفجئه جاني كف طلع فوق راسي ثلاث نجمات تدور وقالي يازنمه خليك عائل والا برجعك (( وأنا اطالع فيه وأقول بقلبي أسكت بس يالاصلع ترى أسم أمك مياده )) وأبتسم له أبتسامه واطالع قدام الا اشوفه متعدي خريص وأنا أستشم وأطالع فيه وأقول وين موديني أنت قال بعدين بتعرف قلت على مين وأمسك الدركسون وأقوله ديور بس الحركات هاذي ماتمشى علينا وهو يمسك فرامل ويوقف بالخدمه وينزل ويجرني من السياره ويقعد يشوت فيني ليت لانت الارض عندي وهو يفتح الشنطه ويجدعني فيها وأحس أن السياره حركت وأطلع ولاعه من مخباتي وأولع الا أشوف قدامي سماعات وأسلاك والتفت يمين الا عدة وأفتحها والقى سكروب وأخذه وأحطه بمخباتي قلت يمكن أحتاجه بعدين وأطالع للاسلاك وأخذ السلك الاحمر وأشبكه مع الاسود وطلع شرار وأنا أضحك مبطي عن الشرار وشوي الا يوم اشتغلت اغنيه رايقه لبنانيه وأنا أندمج مع الكلمات واللحن الهادي ويجيني النوم واطفي الولاعه وأحطه بمخباتي وأحط يدي تحت راسي وأتآمل الكلمات وأنعس وأنقلب على جنبي الثاني وأحس بحرارة وانفز وأصفق فتحت الشنطه من حرارة الولاعه وأنا أرجع وانبطح على بطني وأخمد ...............................
............................. (( نايم الى الحين )) وشوي واسمع صوت غريب يقول هلالــي هلااالــي بصوت وش زينه وماودي افتح عيوني ما اقدر اشوف من هالظلام الي انا فيه وافتح الا اشوف زول اسود والشمس صاقعه عيوني ماعاد اشوف الا سواد وهالزول الاسود يقول هلالــي وبصوت وش زينه وأنا أبتسم مدري وش السالفه واشوف يد سودا ارتفعت من هالزول ولزختني كف وأنزل اغفص بعيوني وأسمع اصوات الي يقول شو هيدا من وين جبتوه والي يقول شو هالفضيحه (( بالبناني طبعاً )) والي يقول شلون هيدا شارك وفاز وأنا ابي اطالع فيهم ماقدرت الى الحين عيوني مظلمه من هالشنطه وأسمع الي جنبي يقولي روح اجلس هناك واطالع هناك ما اشوف الا سواد واناظر فيه وأبتسم وهو يلزخني كف يقول ماعم تسمعا اجلس هناك لين نشوف اخرتها معك الا هو نفس صوت الي بسيارة البيبسي واناظر فيه الا سواد واطالع الا يوم افتر هالسواد واسمع صوته ابعد شوي ودريت انه التفت وراه قام يسولف واطالع بزوله واقعد اتفل عليه ابي ارجع شوي من كرامتي والتلزيخ الي شفته منه والتهيت شوي وانا اتفل ومادريت الا انا مرتفع عن الارض ورجعت بسرعه وساويت الارض وانا ادوخ وأطيح ويغمى علي واخذ ؤقت الا خدي فيه واحد يطبل عليه واسمع هلاالي وانا استانس وتوني مافتحت عيوني واقول شكل هالصوت سعودي وافتح عيوني وابتسم على طول الا واحد يتحمد ربه ويقول شلونك ياهلالي ان شاءالله طيب وناظر فيه شوي والابتسامه ماراحت وأمسكه مع رقبته وأخمه واقعد اقول مشتاق لكم يالسعوديه يابعد ريحة اهلي وهو ياحاول يفك نفسه وانا اقول تكفى لاتخليني واتشبص فيه زود قال يابن احلال وشفيك شكل الطيحه اثرت عليك انت بالسعوديه وانا اللخم واطالع بخشته من قريب توني مافكيت رقبته واقول طيب هالابنانين وشلون مارحت لبنان ماخطفني اللبناني بالشنطه قال لا يابن الحلال انت بشركة بيبسي بمكتب ادارة الجميح للمرطبات واطالع فيه وأفكه بشوية غبنه وقلت طيب وشتبون فيني انتم قال انت يا (هلالي) .....فزت معنا بمسابقة نجوم بيبسي وراح تروح رحله مع النجوم وتسافر للجزيرة بس يبون منك اطيعهم شوي وتصير عاقل وأنا ماصدقت على الله قلت ماعليك اهم شي متى الروحه بس قال عب هالبينات وجهز أوراق السفر وجبها لنا بالنفس المكتب واطالع فيه قلت الاسم الكريم قال خالد قلت ونعم قال ماعليك زود قلت ونعم كثيرات ضحك وقال ماعليك زود يالغالي يالله رح وأطالع فيه قلت ونعم من هنا لين لبنان لزخني كف وقال يالله خلصنا ترى مانا فاضين لك وأنا أنطلق زي الصاروخ واشطف اسياب الشركه ادور مكتبة تصوير بصور اثباتي وابي قلم وأفتح البيبان ولا القى شي وافتح مكتب الا هذا ولد ميادة وجنبه وحده تشق الطير من السماء ويطالع فيني يقول شو جابك لهون قلت جيت بعلمك اني اعرف اسم امك ياولد ميادة مادريت الا الكرسي مسير بوجهي وتجي البنيه وتقول خلاص روح خلص اوراقك قلت طيب وش اسمك ابتسمت وقالت انا مياده قلت احلى امه ونعم قالت شو يعني ونعم قلت يعني اسمك ونعم فيه قالت مافهمت يعني شو قلت يعني انتي ناعمه وهي تلزخ الباب بوجهي وانا اروح انطلق واجي الاستقبال قلت ابي اقرب مكتبه قال جنب الشركه واروح وأصور اثباتي واعبي البينات من راسي واجي وأرجع لشركه واجي مكتب خالد وادخل واعطيه الاوراق ويطالع فيني ويقول وشو قلت عبيت الاوراق وجهزت نفسي قال الله يهديك رح عبها على رواقه بالبيت وجب جوازك وخذ اغراضك معك ملابس ما ملابس قلت ماعندي شي هذا انا اسافر كذا طالع فيني قال توك ياشيخ باقي اسبوع على السفره قلت طيب هالاسبوع وش اسوي قال استريح بالبيت لين نجي وناخذك قلت يارجال مشوار بجلس عندكم هالاسبوع ((اصلن ماصدقت اطلع من السعوديه )) التفت لي وقال بتروح والا شلون دريت انه يبي يصكني كف قمت ورحت للبيت وانتظرت هالاسبوع لين خلص وتجي سيارة البيبسي عند الباب وقالو هاه جاهز قلت ايه.. بس وين ولد مياده ؟؟! المهم قلت لهم دقيقه بجيب ملابسي واجي وأدخل واخذ كيس واحط فيه فنيلة وسروال وثوب ثاني واحط الشماغ على الكتف وسئلت نفسي ليش ما اخذ ملابس الرياضه حقت اخوي وافتح دولابه الا هاذي رياضته واحطها بالكيس واجي عند أميمتي وقلت انا بسافر عمره قالت الله يثبتك ياوليدي انتبه على نفسك قلت ابشري وأنا أنطلق وأناقز واجي الا الرجال فاتح الشنطه واحط الكيس حقي فيها قال شو هيدا قلت مالك شغل ملابسي يالله مشينا قال بتروح لبنان وماخذ كم لبسه بكيس قلت وشدخلك انت امش بس لا اعلم عليك خالد (( يعنني عندي واسطه )) ، وطالع فيني بحقد وقال اركب واركب ويشغل لي نجوى كرم وطول الطريق احتسي له مدى حبي لشعب لبنان وهو يتبسم ويقول الله يخليك وفجئه طرى براسي شي وأنا التفت له وبنظره شرسه قلت بسئلك سؤال يابعد عمري قال تفضل خيو قلت بلبنان فيه بنات ضحك قال اكيد فيه بنات ليش مافيه قلت يعني يمدينا نرقم قال شو يعني يمدينا نرقم ! دريت انه سحله مهوب حق ترقيم قلت سق بس وانت ساكت وانا اسدح المرتبه واتخيل بنيات واعيش جوء ابن كلب ويوم وصلنا وأنزل قبله واروح لخالد واسلم عليه كنه صديقي وقال هاه جهزت أوراقك قلت افا عليك قال طيب اجلس بسئلك بعض الاسئله


وأنا أجلس بكل أدب عشان ياخذوني لبنان قالي ليش خانة رفيقك بالسفر فارغه قلت ما اعرف وش اكتب خليته فاضيه قال يعني فيه رفيق قلت لا مافيه قال يعني اكتب لايوجد قلت الا فيه بس وشو قال وش تقول انت قلت ماعرف الجواب قال ياغبي يعني تبي تاخذ احد معك قلت شلون قال يعني رفيق معك قلت ايه ابي رفيق قال منهو قلت مدري ويقعد يحذف على ادوات المكتب وأنا أزبن تحت الطاوله واسمعه يقول الله يعديها على خير قال طيب قم قلت لا نزل الفرجال الي بيدك وأطالع قال مابيدي شي قلت طيب وين الخرامه ما اشوفها قال يابن الناس اطلع وأطلع بحركه حذره وأشوف ادوات المكتب واشوف يديه قلت طيب وخر المقلمه عنك وهو ياخذها ويحذفها علي قال هاه ارتحت وارجع اجلس قال اسمعني انت تبي احد من العيال يخاويك أنطميت شوي قلت ماعندي احد اصلن كلهم معتبريني مرجووج بالحارة انواع التشويت وعشان خشمي يسبب لهم احراجات بالاماكن العامه مايخذوني قال خلاص خلاص طيب كسرت خاطري قال هل سافرت قبل لدوله خارج الخليج قلت ايه الطائف وهو يمسك المكتب بكبره ويرجده فيني وانا ادوخ شوي وقالي المخرج ترى طولتها كل شوي دايخ ومنصرع خلاص قم وأنا اقوم واجلس قالي طيب وين جوازك قلت مابعد تجوزت الا اشوف خالد قام دريت انه يبي يضربني وهو يطلع عجرا من تحت المكتب ويقعد يلزخني لين فقدت الوعي


الا ظلام ومافيه ولا صوت هدوء غير طبيعي وخفت افتح قلت خلني مغمض لين احس بالاطمئنان وأفتح عيوني (( ترى ماكتبت لكم السالفه الا عشان اعلمكم أني أعرف كلمة الاطمئنان )) واسمع صوت صوت مشي وانا أشد عضلات عيوني مابي اغفل وافتح عيوني ثمن اروح غلطه ما ادري ويني فيه واخذ شوي الا احس واحد واقف جنبي ويتمقلني واسمع صوت مشي بعد وكل شوي يقرب الا واحد يقول مابعد صحي الا يرد عليه صوت أنعم من الناعم ناعم بالحيل يقول شكله مراح يصحى اثار الضربات كتير خطيره وأنا أقول بقلبي يابعد قلبي وش هالصوت الي خايف علي وأنا أقرر أني ما افتح عيوني والا اسمع اصوات مشيهم كل شوي تخف لين ماعاد اسمع شي وأنا أفتح عيوني الا ظلام وأنا أقمط وطالع شوي وأركز الا فيه ضوء خفيف اروح يمه الا باب وافتح شوي ا الا حنا بالليل وفيه انوار خفيف وقدامي جسر وامشي شوي الا سيب التفت يمين مافيه احد ويسار مافيه احد وأتقدم شوي الا بحر دريت اني بسفينه مدري مركب وأنا أقمط ويطلع من بطني صوت غررررررووو غوووووووور غروووووووو طاقني الجوع وطلع واسكر الباب عشان لو يجي احد مايشوف الباب فاتح يحسبني انحشت والا صحيت والف مع اول لفه يمين دايمن يقولون ليه هز الحديد أول نطلع على اليمين عشان تكون فاتحت خير وادور اي شي يؤكل واقعد اشمشم والا اسمع صوت ضحك وهستره واقعد اقول بقلبي العن ابو القنوات الفضائيه (( مدري وش الطاري )) وأمشي شوي الا اسمع ورى باب صوت صراخ خفيف وأقرب أذني الا يوم دخت مقدرت اسوي شي والصق أذني بالباب واحط خدي على الباب ومن قوة الذوبان قعدت ابوس الباب والزق بطني على الباب خشيت جوء وانا مدري وفجئه انفتح الباب وأنا اسير داخل واخبط بالارض الا واحدن جثه وحدتن ****** ماتنقال وهو يقول شو عندك وائف على الباب قلت ادور المطعم اقصد البحر ملخم شو مطعم وبحر تؤكل على برى وانا اطلع الا بنت اللذينا شسمها ذي ... اليساء بوجهي وانا اللخم ومدري وين اروح واشوفها متجه لي واطالع يساري الا البحر وانا أنط ويوم نطيت خلاص جيت بلمس الماء تذكرت اني ما اعرف اسبح واسمع صرخت اليساء شو مهضومه وأنا ابتسم للبحر واقعد أخمس فيه احاول اسبح واطالع لسفينه الا اليساء تصايح وانا استانس قلت شكلها خايفه علي وتطلع يد مدري من وين وتلزخني كف الزبده انها يد المخرج وانا احاول انقذ نفسي وطاحت جنبي كفره ملونه ابيض باحمر واناظر فيها واضحك وادور جوالي بصورها مقطع بلوتوث جديد كفره ملونه ومالكم بالطويله (( أقول وش خليت أنت بس )) وكل شوي انزل بالبحر دريت اني بغرق خلاص واطالع باليساء نظرة واحد حبيب وأقول خلاص أنتهينا وأطالع فوق وأتشهد وبدا الماء يدخل باذوني وصل لعيوني وانا اسكر عيوني وأفتح عيوني الا أمي قاعده معها فنجال فيه ماء تاخذ منه وترش علي تقول قم يالي ماتستحي ورآك دوام وأنا أناظر فيها وأبتسم وأتخيل اليساء وأمي تسطرني بالفنجال وأنا اللي انقز للسقف واطيح وانااظر الا الوالده قدامي تقوول قم ورااك دوام لاتتاخر

مايستفاد من القصه
1- لاتطلع من البيت الا انت قايل لاهلك .
2- الدنيا مافيها خير ماتدري متى تنتهي واليساء ماراح تنفعك .
3- البيبسي مشروب بارد نشربه بعد كل وجبه <<<< قل قسمن .
4- أذكر ربك وين ماكنت وأنطق الشهاده ولك الآجر .
5- نام بدري تقوم بدري .
6- كــاني جحدت خويي كاكا وماخذيته معاي الى لبنان هههههههه

جميع الحقوق محفوظه لدى Cnn الدوليه المتحده القووية اللي بالتلفزيون
الكاتب : حمزة ادريس ومحمد الدعيـع

منقووول مع بعــض السمكـــرة المتعبــه هههههه